pour le Prince Artibie : & quand ſon Tombeau euſt eſté couvert de deſpoüilles d’Ennemis vaincus, & de Trophées d’Armes briſées ; il n’euſt pas eſté plus honoré, que de voir ſes Cendres arroſées des larmes du plus Grand Prince du monde : & d’un Prince encore qui avoit une douleur ſe ſensible dans le cœur, qu’elle le pouvoit preſques raiſonnablement diſpenser d’avoir de la ſensibilité pour nulle autre choſe.
Cependant la pointe du jour paroiſſant, il fut adverti que l’eſpouvante eſtoit ſe grande dans Artaxate, & qu’il y avoit une conſternation ſe univerſelle, que le Roy d’Armenie en eſtoit ſorti avec toute ſa Cour, & une partie de ſes Troupes : pour ſe retirer ſur le haut de certaines Montagnes inacceſſibles, où il y avoit meſme des Chaſteaux aſſez bien fortifiez, & qui eſtoient du coſté oppoſé à celuy où il eſtoit alors. Il sçeut encore que ce Roy avoit emmené la Reine ſa femme, & les Princeſſes ſes filles : & il s’imagina que peut eſtre Mandane y eſtoit elle auſſi. Il euſt bien voulu à l’inſtant meſme aller apres : mais on luy aſſura qu’auparavant qu’il fuſt ſeulement en eſtat de partir, le Roy d’Armenie ſeroit arrivé au lieu de ſon Azile, où il n’auroit plus rien à craindre que la faim. Neantmoins comme Cyrus ne voulut pas ſe fier à ce qu’on luy en diſoit ; il monta à cheval, apres avoir commandé à un Chirurgien Egyptien qui eſtoit dans les Troupes de Chipre, d’embaumer le corps du Prince Artibie de cette excellente maniere que l’on pratique en ſon Païs, & qui rend les morts incorruptibles ; voulant luy tenir ſa parole. Il laiſſa ordre auſſi de faire un compliment à la Princeſſe de Pont, de ce qu’il ne la verroit qu’à ſon retour : & ces ordres eſtant donnez, il fut avec
