du feu pour embraſer le Chaſteau, s’ils n’euſſent eu peur de bruſler Cyrus, en bruſlant ceux qui le vouloient perdre. Cent hommes portant un Belier, eſtoient deſja preparez pour s’avancer vers la porte du Chaſteau, ſoutenus de deux mille autres pour donner l’aſſaut, quand la bréche ſeroit faite ; & ceux-cy de plus de cent mille : lors que l’on entendit un grand bruit vers la main gauche, qui dans la confuſion des voix, ne laiſſoit pas de faire connoiſtre malgré le tumulte, que c’eſtoient des cris d’allegreſſe. Un moment apres, les Rois de Phrigie & d’Hircanie, accompagnez de Perſode, d’Artibie, d’Aduſius, d’Artabaſe, du Prince de Paphlagonie, de Thimocrate, de Philocles, & de beaucoup d’autres ; virent paroiſtre Thraſibule, Hidaſpe, Aglatidas, & le fidele Orſane, qui conduiſoient Cyrus, qu’ils avoient delivré heureuſement par une feneſtre de ſa chambre, qui donnoit dans les foſſez du Chaſteau, dont ils avoient arraché les grilles, un moment apres que Metrobate l’avoit quitté. Cette veuë fit un effet prodigieux : & tout ce qu’il y eut d’hommes en ce lieu là, prononcerent le nom de Cyrus, ou celuy d’Artamene : parce qu’ils luy donnoient encore indifferemment l’un & l’autre.
Cependant ce Prince genereux, apres avoir veû d’un coup d’œil les Eſchelles, les Beliers, & tous les apreſts faits pour l’attaque du Chaſteau ; ſans rien dire de ſon intention à ſes illuſtres Amis, comme il fut arrivé dans la Place l’Eſpée à la main (car on luy avoit donné une en le delivrant) tout d’un coup ſe ſeparant de ceux qui l’environnoient, & qui le vouloient ſalüer : il s’eſlança vers la porte du Chaſteau : ſi bien que Ciaxare qui s’eſtoit mis à un Balcon pour voir quelle eſtoit la cauſe
