X
Lettre de Henri IV au duc de Joyeuse.
À mon cousin le duc de Joyeuse, pair, mareschal de France et mon lieutenant général au pays de Languedoc.
Mon cousin, je crois qu’il vous sera resouvenu de la charge expresse que je vous donnay à vostre partement de tenir la main quand vous serès par dela à ce que l’édict du parisis des greffes fust vérifié en ma court de parlement de Thoulouse, comme il a esté en toute celles de deça. Toutesfois parce que je sus adverty qu’il n’y a encore esté satisfaict, j’en fais présentement une dépesche a ma dicte court de parlement, vous ayant aussy bien voulu faire resouvenir par cestecy de ce que je vous en deis à vostre partement, et vous prie de leur faire bien comprendre comme la longueur en laquelle ils tiennent ceste affaire porte un extresme préjudice à mes affaires qui manquent à faulte de cela (d’être) secourus du fruict qui doibt provenir desdits édicts en ma province de Languedoc. Je vous veux bien aussy ramentevoir l’estat de ma ville du Puy, que j’entends plus tost empirer qu’aultrement. C’est pourquoy vous me ferès service bien agréable s’il vous est à commodité de faire un voyage pour y remettre les choses en meilleur ordre qu’elles n’y sont, car si cela continue guères davantage, ils me feront prendre quelque résolution qui ne sera à leur honneur ni à leur contentement, ce que je vous prie de leur bien faire entendre, et particulièrement à ceulx que vous sçavès bien qui les soustiennent en cela ; et n’ayant pour ceste fois à vous dire rien icy davantage, je prie Dieu, mon cousin, vous conserver en sa saincte garde. Escript à Rouen le 11e jour de décembre 1596.
