p159
qu’il faloit aller querir la platine sacree, qui estoit gardee dedans le thresor du chasteau. Ceux qui estoient là en parloient comme d’une chose veritable, et asseuroient qu’il n’y avoit que les personnes chastes qui pussent marcher dessus sans se brusler la plante des pieds. Il y avoit là une servante qui la vouloit aller querir, mais Oronte luy dit ne te mesle point de cela je te supplie ; je ne voudrois pas respondre de toy, tu és trop affettee ; apren que celles qui ont tant soit peu laissé aller le chat au fromage, n’oseroient toucher à cette platine. Il ne la faut envoyer querir que par de petits enfans, de la chasteté desquels l’on est asseuré. Que les deux filles de nostre jardinier y aillent. Tout aussi tost ces deux petites villageoises furent menees au
