Cette page n’a pas encore été corrigée
qui se forgeoient en ma teste, et le noble estuy de toute ma doctrine. N’en pleurez point, dit Anselme, son heure estoit venuë. Nous luy ferons un vain tombeau comme nous voulions faire pour vous, croyans que vous fussiez perdu. Et puis pourquoy ne vous consolerez vous pas, puis que l’on vous en promet un plus beau ? Carmelin ayant songé quelque peu, reprit la parole en cette sorte. Mais quoy ce chapeau sera-t’il donc, monsieur, de fine laine ? On ne luy donna pas le loisir d’achever ce plaisant discours, ny a Anselme de luy respondre : car chacun se prit à rire aussi tost, et Montenor principalement qui sçavoit qu’Anselme venoit d’une race de marchands du costé paternel, et que le drap et la laine avoient bien servy à le faire
