moins difficile à afronter que quelque grand promontoire, tant pource qu’elle entre auant dedâs la mer, que pour les rochers, qui sont à l’entour et en front du riuage. Ceste isle a esté decouuerte fortuitement, et au grand desauantage de ceux qui premierement la decouurirent. Naufrage d’une nauire Portugaise. Quelque nauire de Portugal passant quelquefois sur ceste coste par imprudence et faute de bon gouuernement, hurtant contre un rocher pres de ceste isle, fut brisée et toute submergée en fond, hors-mis vingt et trois hommes qui se sauuerent en ceste isle. Auquel lieu ont demeuré l’espace de deux ans, les autres morts iusques à deux : qui cependant n’auoient vescu que de rats, oyseaux et autres bestes. Et comme quelquefois passoit une nauiere de Normandie retournant de l’Amerique, mirent l’esquif pour se reposer en ceste isle, où trouuerent ces deux pauures Portugais, restans seulement de ce naufrage, qu’ils emmenerent auec eux. Isle des Rats pourquoy ainsi nômée. Et auoient ces Portugais nômé l’isle des Rats, pour la multitude des rats de diuerse espece, qui y sont, en telle sorte qu’ils disoient leurs compagnons estre morts en partie, pour l’ennuy que leur faisoit ceste vermine, et font encores, quand l’on descend là, qu’à grande difficulté s’en peult-on defendre. Ces animaux viuent d’œufs de tortue, qu’elles font au riuage de la mer, et d’œufs d’oyseaux dont il y a grande abondâce. Aussi quand nous y allames pour chercher eau douce, dont nous auions telle necessité, que quelques uns d’entre nous furent contrains de boire leur urine : ce qui dura l’espace de trois mois, et la famine quatre, nous y vîmes tant d’oiseaux et si priuez qu’il
