amoureux de cette bergere, sans luy donner une opinion qui ne fust moins honneste, que ne pouvoit souffrir le nom qu’il prenoit de vierge druide.
Ce cahos et cette confusion de tant de difficultez l’agiterent de telle sorte qu’il ne put s’empescher de souspirer diverses fois, assez haut pour estre entendu de ces deux bergeres, qui n’ayans pu clorre l’œil pour dormir, l’avoient toutesfois tenu clos pour en faire le semblant, afin de ne point interrompre son repos; mais l’oyans maintenant souspirer, et cognoissans qu’il estoit esveillé, Astrée ressentit bien qu’il est vray qu’une grande affection est continuellement en crainte. Car, quoy qu’elle sceut qu’encores qu’Alexis dist avoir du mal, ce n’estoit que pour couvrir la longueur de son sejour auprés d’elle, si ne pust-elle s’empescher de craindre que quelque mal veritable ne fit naistre les souspirs qu’elle entendoit. Et cette doute fut cause que, se tournant doucement du costé de Phillis qu’elle sçavoit bien ne dormir pas: Ma sœur, luy dit-elle le plus bas qu’elle pust, n’oyez vous point les souspirs d’Alexis? J’ay peur que son mal ne soit plus grand qu’elle ne nous dit. – Je les ay ouys, respondit Phillis, il y a desjà quelque temps, et j’ay eu la mesme apprehension. Toutesfois, il me semble que ce sont plustost souspirs d’une personne souciée, que non pas de malade; car ceux qui procedent de maladie sont plus semblables à une violente respiration, que non pas aux souspirs ordinaires que la passion
