aimé ces belles estrangeres ; car autrement il les aimeroit encores, d’autant que les liens d’amour ne se peuvent ny user ny rompre. – S’ils ne peuvent estre usiez ny rompus, respondit Hylas, ils sont donc bien aisez à desnouer. – Tant s’en faut, repliqua Silvandre, tous les nœuds d’amour sont Gordiens. – Si cela est, dit Hylas, j’ay donc la mesme espée de celuy qui jadis ne les pouvant desnouer, les coupa ; car je sçay bien que je me suis defiait de ceux de plusieurs. – Ne croyez point, adjousta Silvandre, que vous les ayez aimées, car vous les aimeriez encores. – Je ne croy pas, dit Hylas, ce que je sçay ; c’est pourquoy, sçachant tres-asseurement ce que je dis, pour vous faire plaisir je ne le croyray pas. Et vous, pour ne m’importuner d’avantage, demeurez en vostre humeur melancholique, sans m’embrouiller d’avantage le cerveau de vos impertinentes opinions.
Phillis, qui estoit discrette, voyant que Hylas relevoit la voix avec colere, luy dit pour l’interrompre : Encor faut-il, Hylas, que je me fasche contre vous, de ce que vous m’avez empesché de sçavoir les nouvelles que ces estrangeres avoient commencé de raconter. – Ma maistresse, respondit-il, j’aymerois mieux ne les avoir jamais aimées, que si elles est oient cause que vous eussiez quelque mauvaise satisfaction de moy. – Je sçay bien, respondit
