l’artifice) qu’une mesme escorce les lioit, et les tenoit ensemble. En la branche qui estoit à côté on voyoit dans l’escorce, HESUS ; et en celle qui estoit à costé gauche, BELENUS, et en celle du milieu, THARAMIS, Au tyge d’où ces trois branches sortoient, il y avoit THAUTATES, et en haut où elles se reunissoient, il y avoit de mesme, THAUTATES.
Ces choses qui estoient selon la coustume de leur religion (car ils adoroient Dieu sous les types des chesnes) ne les estonnerent point, mais si fit bien ce qu’ils aperceurent à main gauche. C’estoit un autre autel qui estoit aussi de gazons, avec deux grands vazes de terre dans lesquels estoient deux types de mirte. Au milieu l’on voyoit un tableau, par-dessus lequel les deux mirtes, pliant les branches, sembloient luy faire une couronne ; et cela estoit bien recogneu pour n’estre pas naturel, mais entortillé de ceste sorte par artifice. Le tableau representoit une bergere de sa hauteur, et au plus haut du tableau il y avoit : C’est la déesse Astrée, et au bas on voyoit ce vers :
Plus digne de nos vœux, que nos vœux ne sont d’elle.
Si tost que Diane jetta les yeux dessus, elle se
