Gaule, où s’usurpant avec une extrême tyrannie, non seulement nos biens, mais nos aines aussi, ils voulurent changer nos ceremonies, et nous faire prendre leurs dieux, nous contraignant de leur bastir des temples, de recevoir leurs idoles, et de representer Teutates, Hesus, Belenus et Tharamis avec des figures de leur Mercure, Mars, Appollon et Juppiter. Et parce que les druides s’opposerent vertueusement à leur abus, il y eut un de leurs empereurs qui par edit du Senat, voulut abolir toute nostre religion, chassant et bannissant les druides hors de l’Empire. Mais ce grand Teutates a permis que les bons ayent esté persecutez pour esprouver leur vertu, et non pas abolis, afin de donner cognoissance que jamais ils ne sont entierement abandonnez. Et ainsi parmy la tyrannie de ces estrangers, nous avons tousjours conservé quelque pureté en nos sacrifices, et avons adoré Dieu comme il faut, et mesme en ceste contrée où nous n’avons jamais recogneu la puissance de ces usurpateurs pour le respect qu’ils ont tousjours porté à Diane, de laquelle ils ont pensé que nostre grande nymphe representait la personne. Et maintenant que les Francs ont amené avec eux leurs druides, faisant bien paroistre qu’ils ont esté autrefois Gaulois, il semble que nostre authorité et nos sainctes coustumes reviennent en leur splendeur. – Mais,
