entrez, il degasta toute la terre, après retorna pour yverner à Es la Chapele. Entre ces choses, ses fiuz Pepins, qui en Pannonie fu entrez, se combati aus Huns et les chaça toz desconfiz outre une iaue qui a non Thizan[1]. Tot lor païs et lor chans degasta, lor tresors et lor richeces ravi, et puis retorna à son pere à Es la Chapele et li presenta les richeces que il avoit conquises sor les Huns en Pannonie, et li rois en envoia une partie à l’eglise de Rome, et l’autre departi, par grant liberalité, à ses princes et à ses chevaliers. Cil Thudons, dont l’estoire a desus parlé, qui estoit uns des princes des Huns, vint au roi si com il li avoit promis. Baptiziez fu et tuit cil qui ovec lui furent venu. Sairement fist de loiauté, li rois l’onora moult et li dona aucuns joiaus de ses tresors. Cil s’en retorna atant, mais il ne se tint pas longuement en sa loiauté ne en la foi que il avoit receue, et Diex l’en rendi assez tost après le guerredon ; mes l’estoire se taist atant.[2]Li rois demora cel yver à Es la Chapele jusques après la Resurrection.
[3]Barcinone est une citez qui siet en la marche d’Espagne ; une heure estoit de Sarrazins, autre heure de crestiens. En ce point la tenoit uns Sarrazins qui avoit non Zathons. Cil vint au roi à Es la Chapele et li rendi la cité de sa propre volenté et se sozmist en sa subjection.
- ↑ Trans Tizam fluvium, la Theiss, rivière de Hongrie, affluent de la rive gauche du Danube.
- ↑ Ici, le ms. fr. 20350, fol. 83, de la Bibl. nat., donne la rubrique d’un seizième chapitre : Comment les Sesnes occistrent les messages Charles le Grant, et comment il destruist et gasta tout leur païs.
- ↑ Annales d’Éginhard, année 797.
