eschaperent sanz grief. Menez fu en Bretaigne et rachatez par un des homes le roi qui Cenuphes avoit non[1], et li rois le delivra et l’en renvoia à Rome.
Incidence. — Populaine[2], une citez de Toscane qui siet sor mer, fu robée et praée en ce tens par une maniere de Griex qui sont apelé Orobite[3].
Incidence. — En ce point issirent d’Espagne une maniere de genz qui sont apelé Mor ; en l’ysle de Corse entrerent et destruistrent une cité le jor de Pasques meesmes. Nul home ne lessierent fors l’evesque de la vile et aucuns viellarz malades.
Entre ces choses, Godefroiz, li rois de Danemarche, manda à l’empereor, par marcheanz, que il avoit oï dire que il estoit esmeuz et corrociez vers lui pour ce que il avoit ostoié en l’année devant sor les Abrodiciens et que il s’estoit venchiez des domaches que il li avoient faiz ; et puis manda que volentiers se purgeroit devant li de ceste chose et bien mostreroit que il brisierent les aliances que il avoient à li avant que il ostoiast sor els, et puis requeroit que un parlemenz fust pris d’eus ii et de lor princes outre le flum d’Albe, en la marche des ii roiaumes, si que les causes fussent là recitées et proposées devant toz, et qui auroit tort, si amendast à jugement des barons. Li empereres ne refusa pas le parlement, ainz s’i acorda volentiers. Outre le flum d’Albe assemblerent li dui prince au jor qui fu
