[1]Jusques à la cité de Saintes s’enfui Aygolant et sa gent, qui lors estoit en mains de Sarrazins. Karlemaines ala après et li manda que il li rendist la cité ; et Aygolant li remanda que il n’en rendroit mie ; mais se il voloit bataille il l’auroit par tel convent que la cité fust à celui qui vaincroit. D’ambedeus parz fu ensi la bataille otroiée. Mais le jor devant que les eschieles des crestiens fussent rengiées et ordenées devant les herberges pour combatre, avint une merveille en uns prez qui sont entre la cité et un chastel qui a non Tailleborc[2]. Là fichierent aucun lor lances en terre devant les tentes ; l’endemain les troverent reprises, escorcié[e]s[3] et fouillues, cil tant seulement qui pour la foi Jhesu Crist devoient recevoir martyre en cele bataille. Cist maismes miracles estoit ausi avenuz en une autre bataille, si com l’estoire a lassus conté.
Cil qui lor lances virent fouillues et reprises furent moult lié de ce miracle ; maintenant les coperent après terre. Tuit ensemble se mistrent en une eschiele et ferirent li premier en la bataille. Moult des Sarrazins occistrent ; mais à la parfin reçurent-il martyre pour Nostre Seigneur. Si furent par nombre cil qui ensi morurent entor iiiim. En cele bataille fu Karlemaine à si grant meschief que ses chevaus fu soz li occis, et fu moult enpressiez par la force des païens. Son cuer et sa
- ↑ Turpini historia Karoli magni, chap. x.
- ↑ Taillebourg, Charente-Inférieure, arr. de Saint-Jean-d’Angély, cant. de Saint-Savinien, « quæ sunt inter castrum, quod dicitur Talaburgus, et urbem iuxta fluvium nomine Charantam ».
- ↑ Escorciées, garnies d’écorce, « crastina vero die hastas suas corticibus et frondibus decoratas invenerunt ».
