selonc ses merites, que que ce soit, ou bien ou mal ; car cil Diex qui le petit aubre fait croistre en haut, et le grain du forment qui est porriz en terre fait revivre, croistre et fructifier, resuscitera chascun de mort à vie au darrien jor en sa propre char et en son propre esperit. Et de ce, puez-tu prendre exemple en la nature du lyon. Si li lyons resuscite son foon au tierz jor par son flair et par s’alaine ; quel merveille fu-ce quant Diex li peres touz puissanz resuscita son Fil au tierz jor par sa divine puissance ? Si ne te doit pas resembler noviaus miracles. Quant Elyes et Elisées, si prophete, resusciterent plusors morz, plus legierement donques resuscita Diex li Peres son Fil ; et il meismes qui plusors morz resuscita avant sa passion, en nule maniere ne pooit estre tenuz par mort ; car la mort fuit devant luy, et à sa voiz et à son commandement resuscitent li mort à granz torbes. »
« Lors », dist li geanz, « je voi assez ce que tu diz, mais coment il monta es ciex ? Ce ne puis-je vooir, si com tu diz. »
« Cil », dist Rolant, « qui des ciex descendi legierement, ausi legierement i pot-il monter. Cil qui par soi maismes resuscita de mort, par cele maisme puissance tresperça-il les ciex legierement, et ce, puez-tu vooir legierement par mainz exemples. Voiz-tu la roue du molin tant come elle descent d’amont aval autant remonte-ele d’aval amont ? Uns oisiaus qui vole en l’air, autant come il descent, autant remonte quant il veut. Tu maismes, se tu descenz d’une montagne, tu puez bien monter arriers là dont tu es descenduz. Li soulaus se leva ier par devers Orient et coucha en Occident ; en ce maisme lieu est-il hui levez et redes-
