de sa persone, et les honorerai et sauverai à mon povoir, et tendrai à amor, et garderai à chascun les droiz et les loiz selonc les costumes des païs, en tele maniere que obedience et honeurs roiaus me soit portée de chascun de vous selonc son estat, et consauz et aide pour vous et pour le roiaume defendre, se mestiers en estoit, ausi comme voz devanciers l’ont fait par droit et par raison à ceus qui ont regné devant moi. »
Après le roi, parla [Hinc]mares, arcevesques de Rains, et dist en tele maniere par le commandement Avencien, l’evesque de la cité, et des autres evesques de la province de Treves, comme Haston, l’evesques de Verdon, et Arnoul, evesques de Toul[1], et mainz autres qui presenz estoient :
« Pour ce, dist-il, que il ne semble à aucuns que ce soit desraisons et presumptions, se nous et nostre honorable frere et evesque de nostre province de Rains nous entremetons de l’ordenance et des causes de ceste arceveschié, sachent tuit que nous ne le faisons pas contre le droit des canons, pour ce que l’eglise de Rains et cele de Treves sont sereurs et comprovinciaus en ceste region de Belge, si comme l’auctoritez de sainte Eglise le monstre et l’anciene costume le prove. Et pour ce, doivent-il garder, par commun acort, les establissemenz des anciens peres et des sains sanes. Et si doit estre gardée entre l’arcevesque de Treves et celui de Rains la condition de ce privilege, que cil qui premiers est ordenez est tenuz pour premier ordené, et la divine loys establie de Nostre Segneur dist ensi : Quant tu trespasseras par le champ
- ↑ Arnoul fut évêque de Toul de l’année 847 jusqu’à sa mort (17 novembre 871).
