L’endemain, par matin, que le vent ne fu de riens contraires, les mariniers drecierent leur voiles et se mistrent au chemin et commencierent à sigler à voiles estenduz ; et le vent se feri dedenz qui les commença si tost à mener qu’il sambloit qu’il volassent en l’air. Droitement le jour de la Ternité[1] se partirent touz les pelerins du port de Nimeçon et esrerent si hastivement que le vendredi[2] après il aperçurent la terre d’Egypte et choisirent la cité de Damiete. Là s’en alerent au plus droit que il porent et se hasterent mout de prendre port. Mais il trouverent grant foison de Sarrazins qui leur contredirent le port et se tindrent tuit serré et rengié seur une riviere qui vient de vers paradiz terrestre, que l’en apelle Nilus, qui iluec endroit chiet en mer assez près du port de Damiete, et se mistrent tantost les Sarrazins en galies et en barges pour aler contre euls. Le roy prist conseil à ses barons qu’il porroit faire. Si fu acordé qu’il se tendroient en leur nez jusques à l’endemain. Si tost comme il fu ajorné, il pristrent terre maugré les Sarrazins en une ille[3] où le roy de Jherusalem[4] avoit autre foiz pris port, quant il vint asseoir Damiete. Les barons s’armerent et toute leur gent, et entrerent en galies et en barges, et le roy fu en une petite galie avoec le cardinal qui tenoit le fust de la sainte croiz mout hautement et dignement. En une autre galye qui aloit devant le roi, estoit l’enseigne Saint Denis en France. Et les
