foiz contre Sarrazins et en ocistrent assez et geterent en la riviere de Nilus qui est parfonde et roide. Et pour ce qu’il ne pooient à euls aprochier, il firent une chauciée dessus la riviere de Thaneos[1] pour ce qu’ele estoit parfonde, si qu’il peussent plus legierement avenir aus Sarrazins. Les Sarrazins, qui d’autre part furent, mistrent grant paine à despecier la chauciée et à destruire par engins que il drecierent ; et depecierent i chastiau de fust que li baron avoient drecié sus le pas de la chauciée, si qu’il ne porent passer outre ne à pié ne à cheval.
Si comme il estoient en grant penssée comment il passeroient outre, uns Sarrazins leur dist, qui avoit esté pris en l’ost, qu’il porroient bien passer outre par une voie qu’il leur monstra assez près de la chauciée qu’il faisoient. Lors s’en vindrent au pas que le Sarrazin leur monstra, et passerent tout outre a grant paour qu’il ne fussent noié por le rivage qui estoit mol et plain de fange et de boe, et vindrent droit à la chauciée où les Sarrazins avoient dreciez leur engins pour rompre la chauciée. Quant les Sarrazins les aperçurent, qui garde ne s’en donnoient, si furent touz esbahis ; si tornerent en fuie. Li baron alerent après euls et ocistrent tous ceus qu’il porent ataindre, entre lesquiex Farhadin[2] fu occis, qui estoit le mestre capitaine de leur ost. Après ce qu’il les orent chaciez, il retornerent aus tentes des Sarrazins et ocistrent touz
