mègre. Quant il le virent de tel contenance, il li prierent qu’il preist leur hostieus et leur biens tout à sa volenté. Neis, aucuns s’agenoillierent devant lui aussi comme se ce feust i cors saint et li donnerent quanqu’il volt demander. Diluec s’en parti et commença à avironner tout le païs et à pourprendre touz les enfanz de la contrée, tant qu’il furent plus de lxm. Quant il se vit en si grant estat, si commença à preecher et à despecier mariages et refaire tout à sa volenté, et disoit qu’il avoit pooir d’assoudre de toutes manieres de pechiez. Quant les prestres et les clers entendirent leur affere, si lor furent contraires et leur monstrerent qu’il ne pooient ce faire. Pour ceste achoison les ot en si grant haine le mestre, qu’il commanda aus pastouriaus qu’il tuassent touz les prestres et touz les clers qu’il porroient encontrer. Ainssi s’en ala parmi le païs tant qu’il vint à Paris. La royne Blanche, qui bien sot leur venue, commanda que nul ne fust si hardiz qui les contredeist de rienz, car elle cuidoit aussi comme les autres cuidoient, que ce feussent bonne gent de par Nostre Seigneur ; et fist venir le grant mestre devant lui et li demanda comment il avoit non ; et il respondi que l’en l’apeloit le mestre de Hongrie. La roine le fist mout honorer et li donna granz dons. De la royne se parti et vint à Paris à ses compaignons qui bien savoient sa mauvaistié. Il leur pria qu’il penssassent d’ocirre prestres et clers quanqu’il en porroient trouver, quar il avoit la royne si enchantée et toute sa gent, qu’elle tenoit mout bien à fait quanqu’il feroient.
Tant monta le mestre en grant orgueil qu’il se revesti comme evesque en l’eglise de Saint Huistace de Paris, et preecha la mitre en la teste comme evesque,
