Quant les ii batailles de l’ost Mainfroi furent vaincues, la tierce qui estoit de Puillois et de Sarrazins, en laquelle Mainfroi estoit, fu toute esbahie, et se douta Mainfroi forment, ne ne sot que fere ; si torna en fuie. La bataille Robert de Flandres se feri en euls et en firent grant occision. En une autre partie, furent François qui une grant partie de fuitis enchacierent vers Bounicent, et de si près qu’il se bouterent en la ville avoec eus et mistrent tout à desconfiture, quanqu’il i trouverent, et prinstrent la cité de Bounivent et fu rendue au roy Karle. Celle nuit se reposa le roy et sa gent ; l’endemain il cerchierent le champ où la bataille avoit esté et se merveillierent que Mainfroi pooit estre devenuz, et estoient en doutance que il ne feust eschapé. Toutes voies, fu il tant quis et cerchiez parmi le champ qu’il fu trouvez entre les mors tout ocis par armes[2], et fu congneuz par ceus qui avoient esté pris en la bataille. Onques ne pot l’en savoir certainement qui l’avoit ocis, pour ce qu’il avoit vestu autres armeures que les seues, car il ne vouloit pas estre congneu. Le roi commanda qu’il feust dessevrez des mors et enterrez, que les oisiaus ne devorassent sa charongne. Si fu enterrez en une voie commune près de Bounivent.