pris les greigneurs mestres qui la traïson avoient commenciée contre le roy, et furent mis en fers et en liens. Quant ceste bataille fu ainsi finée et François les orent veincus, il se rescueillirent touz ensamble par le commandement le roy, et leur fu commandé que il ne feussent pas convoiteus de ravir les despueilles des mors ; ançois descendirent de leur chevaus et osterent leur hiaumes pour eus esventer et reprinstrent leur alaines, car il pensoient bien qu’il auroient la bataille à dant Henri d’Espaigne au retorner de la chace des Prouvenciaus.
Après ce que Corradin et sa gent furent desconfiz, ne demoura pas mout que dant Henri retorna arriere, qui avoit chacié les Prouvenciaus. Si monterent une montaigne, lui et sa gent, et commencierent à regarder l’ost au roy Karle et la gent Corradin qui gisoient parmi le champ. Quant dant Henri les vit enmi le champ à banieres desploiées, et les mors qui gisoient par terre, si dist à sa gent : « Seigneur chevalier plain de prouece, nous sommes aujourd’ui beneuré et plain de bonne fortune. Nous avons vaincuz touz les fuianz par delà ces montaignes, et les nostres que vous veez en cele valée, montez seur leur chevaus, ont desconfit la gent Kalot et touz ces François dont vous veez la terre couverte de leur charongnes. » Lors descendirent moult liéement de la montaigne et aprochierent des
- ↑ Guillaume de Nangis, Vie de saint Louis, dans Rec. des Hist. des Gaules et de la France, t. XX, p. 434-437.
