si li revint esperit de force et de vertu et parla à sa gent qui estoient entour lui et leur dist : « Seigneurs chevaliers renommez de force et de prouece, n’aions par paour se cil enchacent noz genz, ne de ceus que vous veez devant vous, jasoit ce qu’il soient greigneur nombre de nous, quar par l’aide Nostre Seigneur, nous les seurmonterons. Assaillons ceus qui sont devant nous et qui nous atendent à bataille avant qu’il nous assaillent, car nous les porrons legierement seurmonter. »
Quant le roy ot ainsi amonnesté sa gent, maintenant hardiece crut as François, et se rescueillirent en armes, et se conbatirent à euls forment et se ferirent mout efforciéement entre leur anemis. Ne ce ne fu pas por neant que la chevalerie de France deservi merites de loenges ; car leur anemis estoient plus assez et miex armez sanz comparaison que il n’estoient, et avoient contre euls des plus fors chevaliers du reamme d’Alemaigne. La bataille fu grant et aspre des ii parties et y ot grant cri et grant noise. Le chaplé fu grant sus les hiaumes et sus les escuz ; et la noise fu mout horrible de ceus qui moroient. Toutes choses qui esmeuvent peril de mort furent iluec veues et esprouvées. Espessement commencierent à trebuschier les Alemanz, et fu le champ tout rouge de leur sanc, ne ne cesserent François de ferir ne de chapler d’espées et de coutiaus jusques a tant que la forsenerie des Alemanz fu toute abatue, et toute la gent Corradin mise à desconfiture, ou morte ou prise. Quant Corradin vit le peril de mort et que tout le fés de la bataille tornoit seur lui, si torna plus tost en fuie que nus de ceus qui estoient en sa compagnie. En celle desconfiture furent
