matin, les mariniers voloient drecier leur voiles, mès le vent se torna contre euls. Quant il virent qu’il ne pooient prendre port pour le vent, si envoierent une barge à Chestiau Castre pour avoir nouvelles viandes. Si trouverent ceus de la ville mout rebelles et contraires qu’à peine leur vodrent-il donner des iaues douces et vin et viandes pour argent à reison. Pourquoi il le firent, si estoit pour ce que il cuidierent tuit estre pris ; et pour la doutance de ce, il porterent touz leur biens en repotailles[1]. Le roy entendi qu’il ne recevoient pas sa gent liéement, si leur envoia i chevalier et manda au chastelain que les malades de son ost peussent prendre recreation en leur chastel, et que il feissent marchié soffisant de leur viandes. Cil de la ville respondirent qu’il voloient bien que les malades eussent recreation en leur chastel, non pas dedenz la ville, mès dehors, car dedenz le chastel ne lesseroient-il nul homme demourer pour les Puiseins[2] de qui le chastel est tenuz. Quant le roy sot leur responsse si commanda que les malades feussent portez au chastel, povres et riches ; desquiex pluseurs morurent en la voie ; les autres furent hebergiez en la maison des Freres Meneurs qui demouroient au dehors du chastel, et les autres furent hebergiez en meisons de terre et de boe où leur capres[3] et lor asnes gisoient. Et si estoient les meisons du chastel bonnes et belles et deffenssables ; poi i trouverent François de vitaille, et ce qu’il i trouverent leur fu vendu chier. La poule qui n’estoit ven-
