l’ost vit cel assaut, si commanda que tuit feussent armez et issi à bataille ordenée et chevaucha tant qu’il se mist entre Carthage et les Sarrazins qui paletoient. Si comme Sarrasins paletoient sanz aprochier, les mariniers assaillirent le chastel et monterent aus murs a eschieles de cordes tenanz à bons crochés de fer, et entrerent eus et prinstrent[1] quanqu’il trouverent ; ne ne perdirent les mariniers que i des leur qui fu ocis d’un dart. Tantost comme il furent ens, il monterent leur banieres par dessus les murs. Quant le roy et son ost virent Carthage pris, si alerent au devant des Sarrazins qui s’enfuioient de Carthage, et en ocistrent une partie. Les autres se bouterent es cavernes pour leur vies garantir ; mais l’en bouta le feu dedenz si qu’il furent touz mors et estainz. En celle guerre furent ocis iiic Sarrazins, sanz cil qui morurent es cavernes. Et ne pourquant pluseurs en eschaperent qui enmenerent la proie du chastel qui bien leur eust esté rescousse ; mès il n’oserent passer la baniere au mareschal.
Quant Carthage fu pris, le roy commanda que l’en getast hors toutes les charongnes des mors et que il feust mondefié de toutes ordures, après ce que les malades et les navrez feussent portez celle part por euls reposer. Dedenz la ville fu trové assez orge ; mès autres biens i trova l’en petit, car quant il sorent la venue le
