qui ne les oserent atendre. La nuit se reposerent jusques au matin[1] que François aperçurent une tour qui estoit près de l’ille ; celle part vindrent et assaillirent la tour. Cil qui la devoient deffendre tornerent en fuie, et François entrerent ens et mistrent à mort ce qu’il trouverent. Si comme Sarrazin s’enfuioient, si encontrerent i amiraut qui leur venoit en aide ; si retornerent vers les François qui les chaçoient et les firent tant reculer qu’il se bouterent en la tour. Quant il les orent enclos en la tour, si pristrent feu, et vouloient ardoir ceus qui dedenz estoient, quant le mestre des arbalestiers i vint atout grant gent, si commença l’estour et se mellerent ensamble. Les Sarrazins ne porent endurer, si s’entornerent à Carthage. L’endemain François s’armerent et vindrent à bataille ordenée vers la tour et passerent outre droit à Carthage, et se logierent en une plaine où il avoit grant plenté de puis dont il arrousoient leur cortiz quant le temps estoit sec.
Quant les barons se furent logié es plains dessous Cartage, les mariniers vindrent au roy et li distrent qu’il li rendroient Carthage s’il leur vouloit donner aide ; et il leur donna v cens sergenz à pié et iiii batailles de chevaliers. Après ce que le roy ot envoié à Carthage, ne demoura guieres que Sarrazins vindrent pateler en l’ost et à assaillir de loing ; et commencierent à traire et à lancier. Quant le mareschal de