Une foiz avint que le conte d’Eu[2] et missire Jehans d’Acre[3] firent le guiet par nuit ; si avint que iii chevaliers sarrazins vindrent à missire Jehan et li distrent qu’il voloient estre crestien, et en signe de pais il mistrent les mains sur la teste et puis baisierent les mainz à ceus qui iluec estoient, en signe d’amour et de subjection, et se rendirent à misire Jehan d’Acre et il les fist mener à sa tente, et il demoura à son guiet. Après tantost, c autres Sarrazins vindrent à lui et jeterent leur lances jus et firent aussi comme les autres et requistrent baptesme hastivement. Ainsi comme le bouteillier et sa gent entendoient aus Sarrazins, tout plain d’autres Sarrazins se ferirent ensamble, les lances droites, en l’ost au bouteillier, si qu’il les reculerent et firent fouir. Lors commencierent à crier : « Aus armes, Aus armes », si que l’ost fu tout esmeu. Mès ançois qu’il feussent armé, les Sarrazins ocistrent lx sergenz qu’à pié qu’à cheval et puis s’enfouirent. Quant le bouteillier ot fet son guiet, si s’en retorna à sa tente et areisonna mout cruelment les Sarrazins, et les reprist de traïson ; des quiex li uns qui resambloit le greigneur mestre, commença à pluerer et soi à escuser. Ce que le Sarrazin disoit, entendi le bouteillier par i Frere
- ↑ Guillaume de Nangis, Vie de saint Louis, dans Rec. des Hist. des Gaules et de la France, t. XX, p. 452-455.
- ↑ Alphonse de Brienne, comte d’Eu, chambrier de France, qui mourut devant Tunis en 1270. Il était fils de Jean Ier de Brienne, roi de Jérusalem.
- ↑ Jean de Brienne dit d’Acre, bouteiller de France, frère d’Alphonse de Brienne. Il mourut en 1296.
