pooient venir à l’ost ; car à traire et à amener i tonniau de vin à nostre ost, trente chevaux y couvenoient, en envis le pooient oster et remuer de la boue. Adonques yces domages et males aventures noz François si doloureusement contraignans, inevitables et mescheables, les admena ad ce que il se departissent et remuassent de ce lieu. Et lors, le roy de Navarre Loys, par le conseil de ses barons, le feu premierement mis en leurs tentes et toutes pars, ingloriaux et sanz riens faire, dolent et courroucié, fu contraint à soy enrevenir en France. Et pour ce, les François mistrent en leurs tentes le feu, quar il ne les pooient oster ne remuer de ce lieu ne faire emporter avec eulz pour l’abondance de la boue. Et ensement, ne vouloient que de eulz, Flamens eussent nul profit.
Et ainsi, les François, leurs tentes laissiées et embrasées, et moult de richesces en ycelles estans et deguerpies, dolens et corrouciez, moilliez et crotez, en ce lieu dementans[1], en France s’en revindrent[2]. Et adecertes, Loys roy de Navarre en fu si courrouciez et dolent qu’il jura, si comme l’en dist, que s’il vivoit en l’an ensivant, les Flamens iroit efforciement poursivre et envaïr sanz demeure, et que jamais n’aroit vers eulz nulle accordance, se du tout ne s’abandonnoient à sa volenté faire. Et laissa le roy en ces parties pluseurs serjans et soudois avec appareil batailleurs, qui les pas et les entrées par mer et par terre, en tele
