roignes des chevaux et des gens qui gisoient sus la marine tous corrompuz et touz puanz.
Ainsi comme le roy de Tunes vit celle pestilence et celle grant mortalité de sa gent, et avec ce que crestiens en avoient occis une grante partie, si ne sot que faire ne que dire, ne comment il pourroit durer contre si puissant gent. Si se conseilla à sa gent, meismement à ceulz que il cuidoit estre plus sages, et leur requist et demanda qu’il pourroit faire, ne comment il se pourroit delivrer des François qui li avoient son pays gasté et sa gent occise. Si li fu loué et conseillié qu’il mandast au roy de France que volentiers pacifieroit à lui en aucune maniere souffisant, ou par trives ou autrement. Donc prist le roy de Tunes message et li commanda qu’il alast au roy de France et li deist que volentiers il s’acorderoit à lui et aus autres barons. Le message s’en tourna et vint en l’ost, et monstra signes qu’il estoit messagier. Si li fu envoié i chevalier qui bien savoit parler arabic. Si li demanda le chevalier qui il estoit. Le messagier li dist qu’il estoit messagier de par le roy de Tunes et li dist tout son message et qu’il queroit. Le chevalier le mena à la tente le roy et fist entendant au roy et aus barons qu’il vouloit dire. Le roy de France regarda qu’il ne pourroit pas faire grant profit de demourer en ce pays, meismement pour ce que les Sarrazins ne le vouloient atendre à bataille, et ne finoient que traveillier sa gent et esmouvoir et puis si s’enfuioient contremont les montaignes. Derechief il regarda que s’il prenoit la cité de Tunes par force, que il convendroit qu’il y laissast aucuns de ses barons et de son peuple grant partie, et que tous ceulz qui
