tout asseur, si comme il leur estoit avis et cuidoient que le chastel ne deust estre pris en nulle maniere et que bien se tenist contre touz. Le roy et son ost regarderent qu’il ne pooient pas tant aprochier du chastel si comme il vouldroient. Si s’esmut le roy qui estoit de grant courage et jura que jamais ne se partiroit du siege devant ce qu’il auroit le chastel trebuschié et mis par terre ou que il li seroit rendu. Si se conseilla comment il en pourroit exploitier. Si li fu loé qu’il mandast ouvriers qui trebuchassent la roche, et qu’il feissent la voie large, si que sa gent peussent aler à pié et à cheval. Si commencierent les ouvriers à trenchier la roche et à faire la voie grant et large, si que la gent à pié et à cheval y porent passer.
Quant le conte de Fois vit ce et que le roy estoit si ferme en son propos, il se conseilla qu’il pourroit faire et comment il pourroit eschiver ce peril ; si li fu loé qu’il s’acordast au roy hastivement. Il prist messages et les envoia au roy, et li pria et supplia qu’il li pardonnast son mautalent, et qu’il metoit li et touz ses biens en sa merci et qu’il en feist toute sa volenté[1]. Le roy oy les messages et li manda que il venist à lui en telle maniere comme il avoit mandé. Tantost le conte vint devant le roy et s’agenoilla et li requist merci, et le roy li dist qu’il li feroit plus de bien qu’il n’avoit deservi. Tantost fu pris et lié et mené à Biauquesne[2],
- ↑ La reddition du château de Foix eut lieu le 5 juin 1272 (Hist. de Languedoc, t. IX, p. 17).
- ↑ Biauquesne, Beauquesne. Latin : « Bellusquercus. » Ce n’est pas à Beauquesne, ni à Beaucaire, comme le laisserait entendre P. Paris (Grandes Chroniques, t. V, p. 34, note 1), que le comte de Foix fut mis en prison, mais à Carcassonne (Hist. de Languedoc, t. X, p. 12, § 5).
