prelas et autres à Amiens, et envoia à l’encontre dudit roy d’Angleterre des plus grans de son lignage, qui moult noblement et honnorablement l’admenerent en la cité d’Amiens, en laquele le roy de France attendoit ledit roy d’Angleterre qui li venoit faire hommage de la duchié d’Aquitaine et de Pontieu, si comme dessus est dit.
Quant les deux roy s’entrevirent, si firent moult grant feste l’un à l’autre ; et après ce commencierent à parler, eulz et leur conseil, de moult de choses, et par especial sur la matiere pour quoy ilz estoient assemblez, et li fist requerir le roy de France qu’il feist son devoir par devers luy de la dite duchié d’Aquitaine et de la conté de Pontieu. Lors fu respondu de par le roy d’Angleterre et en sa presence, et fu dit que messire Charles de Valois, pere du dit roy Phelippe, avoit despoillié le roy d’Angleterre, en grant prejudice de li et de son royaume, d’une grant partie de la terre de la duchié d’Aquitaine, et l’avoit appliquée au royaume de France moins justement qu’il ne deust. Pour laquelle cause ledit roy d’Angleterre n’estoit tenu audit hommage faire, se ce qui li avoit esté osté, comme dit est, ne li estoit du tout restitué. Si fu respondu pour le roy de France, que Edouart roy d’Angleterre, pere dudit roy avoit forfaite celle partie et plus, et que ledit messire Charles bien et justement l’avoit acquise au royaume de France par droit de bataille, et que en aucune restitucion il n’estoit tenu. Neantmoins il fu finablement acordé d’une partie et d’autre par tele maniere, que le roy d’Angleterre feroit hommage au roy de France de la duchié d’Aquitaine poour la porcion qu’il en tenoit, et la partie par messire Charles ac-
