royaume, à une heure ; c’est à savoir à heure de tierce, touz les freres de l’ospital de Haut pas et touz leurs biens furent pris du mandement du Saint Pere, car il abusoient des pardons que l’en leur avoit donnez, et mettoient plus à leurs bulles qui n’estoit contenu es bulles que l’en leur avoit données par les papes. Et pour ce, furent-ils mis en diverses prisons souz les evesques esquelles dyoceses il habitoient.
Item, en celle meismes année, environ la feste de monseigneur saint Denis, y vint une très fort gelée, laquelle engela de telle maniere les vingnes par tout le royaume de France que elles ne porent onques venir à meurté. Et furent celle année les vins très mauvais et si en fu pou.
Item, le moys de novembre et au commencement du mois de decembre, furent aussi comme continuelment très grans vens, et les yaues des fleuves furent très grans pour l’inundacion des yaues des pluies.
Item, la veille de monseigneur saint Andri apostre, à Londres en Angleterre, monseigneur Rogier de Mortemer[1], chevalier, duquel et pour lequel Ysabel royne d’Angleterre avoit esté moult grandement diffamée de plusseurs ; et la cause fu car elle monstroit audit chevalier, messire Rogier, devant touz trop grant familiarité. Et aveques ce, ledit chevalier fu convaincu de conspiracion par lui faite contre le royaume d’Angleterre et contre le roy, et du consentement la
- ↑ Roger de Mortimer, qui avait été arrêté à Nottingham le 19 octobre 1330, fut exécuté le 29 novembre suivant (Adam Murimuth, Continuatio Chronicarum, éd. Thompson, p. 61 et 62, et Thomas Walsingham, Historia Anglicana, t. I, p. 193). Cf. Chronique de Jean le Bel, éd. Viard et Déprez, t. I, p. 102-103.
