naut et niece au roy de France ; et s’en alerent es parties de Brebant, Et depuis, se transporta ledit roy d’Angleterre en Alemaigne, et ileques fist moult grans aliances ; et premierement aveques Loys duc de Baviere qui se tenoit pour emperere, ja soit ce que ledit Loys duc de Baviere fust notoirement escommenié de par le pape, et aveques plusseurs autres nobles, lesquiex il prist come soudoiers par certaine somme d’argent à rendre à chascun selon son estat. Et se la somme d’argent n’estoit paiée à certains termes ordennez entre le roy d’Angleterre et les soudoiers, les dictes alliances seroient reputées pour nulles.
Et en ce meismes an, ledit roy d’Angleterre fu ordené et institué, de par ledit duc de Baviere Loys, en vicaire de l’emperere[1] ; lequel faisoit ses vocacions et ses citacions tant comme vicaire de l’emperere, afin que l’en peust envayr très asprement le royaume de France. Mais pou lui obeirent en ce mandement.
Item, en ce meismes an, le xv jour d’avril, il apparut une autre comete assez près de la Petite Ource, et estoit pou clere et ronde sanz cheveux. Et ainsi furent en i an ii cometes.
Item, en ce meismes temps, le roy de France Phelippe oy dire que le roy d’Angleterre estoit alié aveques les Alemans et que son entente estoit d’envaïr le royaume de France. Adonques ledit roy Phelippe assambla i si grant ost[2] que l’en lit pou le roy de
