et non nobles, desquiex nul ne scet le nombre fors Dieu seulement. Toutes voies, les hommes ruraux de la Roche Derian et des villages d’entour jusques à trois liues de toutes pars qui estoient en la servitute des Anglois, avoient grant compassion de leur gent, si comme il monstrerent par après. Mais il ne savoient autre chose faire que labourer leurs terres ne autrement vivre. Adonc quant il virent que la plus grant partie des Anglois qui estoient ou chastel de la Roche Deryan estoient yssus pour aler à la trayson et à la prise de Lannuon que les traittres dessus diz avoient ja vendue, si le manderent et firent savoir à grant force de Bretons qui estoient pour le temps en la ville de Guengamp. Lors ceulz de Guengamp ordenerent i grant ost souz monseigneur Geffroy Tournemine, chevalier, pour prendre le chastel de la Roche Deryan. Mais quoy avint-il ? Les Anglois de la ditte Roche apperçurent que les ruraux avoient descouvert et notifié leur fait aus Bretons de Guengamp, si demanderent ayde à ceulz qui traitreusement avoient prise la ville de Lannuon. Lors les Anglois de Lannuon vindrent en aide à ceulz de la Roche, et amenerent avant eulz leurs prisoniers et les meubles qu’il avoient pris en la ville de Lannuon et la laissierent vuide et despoilliée de touz biens. Et quant il approchierent de la Roche, le duc de Guengamp et ses gens estoient ja venuz au devant jusques à la Roche. Lors les Anglois laissierent la droite voie qui va de Lannuon à la Roche, et passerent une yaue qui est nommée Yaudi[1] par un gué qui est dit le gué du Prevost, et se mistrent entre la
- ↑ Auj. Jaudy (Côtes-du-Nord), une des deux branches mères de la rivière de Tréguier.
