verneurs des dictes communes requistrent au conte de Flandres que ceulz qui avoient esté collecteurs de celle grant somme d’argent, rendissent conte des receptes et des mises ; laquelle chose le conte fu refusant de faire, dont grant dissencion et grant descort s’esmut entre eulz : car les collecteurs qui se sentoient fors et puissans commencierent à traitier secretement avec le conte comment il pourroient humilier, sousmettre et abaissier ceulz qui vendroient de par les communes pour oyr le conte de l’argent qui avoit esté levé. Avec ce, orent aussi parlement aus riches bourgois et aus greigneurs de Bruges, d’Ypre et de Courtray, et se conseillierent ensemble. Si vindrent à Courtray en la ville, et supposoient que ceulz des communes venissent à eulz pour requerir à oïr leurs contes et leurs receptes ; et estoit leur entencion, quant il fussent venuz, qu’il les eussent pris et puis eussent fait de eulz leur volenté. SI avoient eu tel conseil qu’il bouteroient le feu dedenz les forbours de la ville de Courtray, afin quant il venissent, qu’il ne trouvassent où eulz mettre fors en la ville, et ainsi les prendroient plus legierement. Le conseil fu acordé ; si bouterent le feu es forbours. Mais ce qu’il avoient malicieusement pensé contre leurs prochains, Dieu tourna sur eulx ; car le feu si s’espris si fort et de tel façon que nonmie seulement il ardi les forbours, mais ardi forbours et ville tout ensemble. Laquelle chose voianz les habitanz de Courtray et cuidans que ceste chose eust esté faite par traïson tant du conte comme de sa gent, ceulz qui premierement estoient de son aide et de sa part se vouldrent armer contre li asprement et viguereusement ; et jasoit ce que d’une part et d’autre y eust
