« Et si n’ont cure quels est s’estracion. (*)
« Se bien séussent com chevir en porront,
« Ja ne fesissent del plait plus lonc sermon, (*)
« Trosque séussent de cele amendison (*)
« Li rois ses peres se la volsist o non.
« S’ele i a colpes, et s’ensi le trovons,(*)
« A mort soit mise ; mais se prover puet on
« Chose que non, nos la respiterons. » (*)
« Sire emperere, dist Naimes de Baivier,
« Ne créés pas conseil de pautonier.
« Grans est l’ovraigne qui la vuet deviser ; (*)
« Que Blancheflor, la roïne al vis cler,
« Fille est à roi qui tient moult grant regnier, (*)
« Costantinoble, ensi se fait claimer.
« Moult a de terre à tenir et garder,
« Et si puet faire moult de gent asembler.
« Quant oïra les noveles conter
« De soe fille à tel vilté jugier, (*)
« Ne croi vos aime la monte d’un denier.
« Asés vos puet honir et encombrer ;
« Conseil vos doin que l’aliés espargnier (*)
« Tant qu’à son pere vos mandiés mesagier
« Trestot l’afaire et dire et deraisnier,
