« Et si méist pais et acordison
« Entre parens qui ont desputoison ! »
Quant Ogiers fu à Varocher venus,
Il l’en apele, ne se contint pas mu :(*)
« Chevaliers sire, vos m’avés decéu
« Quant avant moi estes ou champ venus.
« Volés mostrer contre moi vo vertu
« O envers moi vos claimer recréu ? »
Dist Varochers : « Avés le sens perdu ?
« Cuidés que soie ci orendroit venus
« Por chanson dire ou faire aucun deduit,
« Non por combatre o le branc d’acier nu ?
« Se estes tés com avés nom éu,
« Ja ne serés envers moi recréus. »
Dist li Danois : « Bien vos ai entendu. »
De champ se donent une archée et plus.
L’uns contre l’autre point le destrier crenu
Et brandist l’anste dont li fers est agus.
Comunaument se sont entreferu,(*)
Froisent les targes trestotes par menu,
Des fers trenchans ont les haubers ferus ;
Mais cil les ont de morir defendus.
