qu’à luy, et par les arguments et charges qui ne peuuent appartenir à sondit consort. Car l’effect d’iceluy est bien de conuier inopportunément par fois, mais refuser, iamais : et de conuier encore tacitement et quietement. Partant se void l’animosité et illégalité manifeste des accusateurs. Quoy qu’il en soit, protestant, que les Aduocats et luges ont beau quereller et sentencier : nature tirera cependant son train : qui n’auroit faict que raison, quand elle auroit doué ce membre de quelque particulier priuilege. Autheur du seul ouurage immortel, des mortels. Ouurage diuin selon Socrates : et Amour désir d’immortalité, et Dæmon immortel luy mesmes.Tel à l’aduenture par cet effect de l’imagination, laisse icy les escrouëlles, que son compagnon reporte en Espaigne. Voyla pourquoy en telles choses l’on a accoustumé de demander vne ame préparée. Pourquoy praticquent les Médecins auant main, la créance de leur patient, auec tant de fausses promesses de sa guerison : si ce n’est afin que l’effect de l’imagination supplée l’imposture de leur aposéme ? Ils sçauent qu’vn des maistres de ce mestier leur a laissé par escrit, qu’il s’est trouué des hommes à qui la seule veuë de la médecine faisoit l’opération. Et tout ce caprice m’est tombé présentement en main, sur le conte que me faisoit vn domestique apotiquaire de feu mon père, homme simple et Souysse, nation peu vaine et mensongiere : d’auoir cogneu long temps vn marchand à Toulouse maladif et subiect à la pierre qui auoit, souuent besoing de clysteres, et se les faisoit diuersement ordonner aux Médecins, selon l’occurrence de son mal : apportez qu’ils estoyent, il n’y auoit rien obmis des formes accoustumées : souuent il tastoit s’ils estoyent trop chauds : le voyla couché, renuersé, et toutes les approches faictes, sauf qu’il ne s’y faisoit aucune iniection. L’apotiquaire retiré après cette cérémonie, le patient accommodé, comme s’il auoit véritablement pris le clystere, il en sentoit pareil effect à ceux qui les prennent. Et si le Médecin n’en trouuoit l’opération suffisante, il luy en redonnoit deux ou trois autres, de mesme forme. Mon tesmoin iure, que pour espargner la despence, car il les payoit, comme s’il les eut receus, la femme de ce malade ayant quelquefois essayé d’y faire seulement mettre de l’eau tiède, l’effect en descouurit la fourbe ; et pour auoir trouué ceux-là inutiles, qu’il faulsit reuenir à la première façon.Vne femme pensant auoir aualé vne espingle auec son pain, crioit et se
