des Roys, bas et viles. Et refusa Empedocles la royauté, que les Agrigentins luy offrirent. Thales accusant quelquefois le soing du mesnage et de s’enrichir, on luy reprocha que c’estoit à la mode du renard, pour n y pouuoir aduenir. Il luy print enuie par passetemps d’en montrer l’expérience, et ayant pour ce coup raualé son sçauoir au seruice du proffit et du gain, dressa vne trafique, qui dans vn an rapporta telles richesses, qu’à peine en toute leur vie, les plus expérimentez de ce mestier là, en pouuoient faire de pareilles. Ce qu’Aristote recite d’aucuns, qui appelloyent et celuy là et Anaxagoras, et leurs semblables, sages et non prudents, pour n’auoir assez de soin des choses plus vtiles : outre ce que ie ne digère pas bien cette différence de mots, cela ne sert point d’excuse à mes gents, et à voir la basse et nécessiteuse fortune, dequoy ils se payent, nous aurions plustost occasion de prononcer tous les deux, qu’ils sont, et non sages, et non prudents.
Ie quitte cette première raison, et croy qu’il vaut mieux dire, que ce mal vienne de leur mauuaise façon de se prendre aux sciences : et qu’à la mode dequoy nous sommes instruicts, il n’est pas merueille, si ny les escoliers, ny les maistres n’en deuiennent pas plus habiles, quoy qu’ils s’y facent plus doctes. De vray le soing et la despence de nos pères, ne vise qu’à nous meubler la teste de science : du iugement et de la vertu, peu de nouuelles. Criez d’vn passant à nostre peuple : Ô le sçauant homme ! Et d’vn autre, Ô le bon homme ! Il ne faudra pas à destourner les yeux et son respect vers le premier. Il y faudroit vn tiers crieur : Ô les lourdes testes ! Nous nous enquerons volontiers, Sçait-il du Grec ou du Latin ? escrit-il en vers ou en prose ? mais, s’il est deuenu meilleur ou plus aduisé, c’estoit le principal, et c’est ce qui demeure derrière. Il falloit s’enquérir qui est mieux sçauant, non qui est plus sçauant.Nous ne trauaillons qu’à remplir la mémoire, et laissons l’entendement et la conscience vuide. Tout ainsi que les oyseaux vont quelquefois à la queste du grain, et le portent au bec sans le taster, pour en faire bechée à leurs petits : ainsi nos pédantes vont pillotans la science dans les Hures, et ne la logent qu’au bout de leurs léures, pour la dégorger
