incertaines et fauces, qu’il est mal-aisé d’y establir aucun solide iugement. Voyez Cimon, voyez Themistocles et mille autres, combien ils se sont disconuenuz à eux mesmes. Les petits des ours, et des chiens, montrent leur inclination naturelle ; mais les hommes se iettans incontinent en des accoustumances, en des opinions, en des loix, se changent ou se déguisent facilement. Si est-il difficile de forcer les propensions naturelles. D’où il aduient que par faute d’auoir bien choisi leur route, pour néant se trauaille on souuent, et employé Ion beaucoup d’aage, à dresser des enfans aux choses, ausquelles ils ne peuuent prendre pied. Toutesfois en cette difficulté mon opinion est, de les acheminer tousiours aux meilleures choses et plus profitables ; et qu’on se doit peu appliquera ces légères diuinations et prognostiques, que nous prenons des mouuemens de leur enfance. Platon en sa republique, me semble leur donner trop d’autorité.Madame c’est vn grand ornement que la science, et vn vtil de merueilleux seruice, notamment aux personnes esleuees en tel degré de fortune, comme vous estes. À la vérité elle n’a point son vray vsage en mains viles et basses. Elle est bien plus fiere, de prester ses moyens à conduire vne guerre, à commander vn peuple, à pratiquer l’amitié d’vn Prince, ou d’vne nation estrangère, qu’à dresser vn argument dialectique, ou à plaider vn appel, ou ordonner vne masse de pillules. Ainsi Madame, par ce que ie croy que vous n’oublierez pas cette partie en l’institution des vostres, vous qui en auez sauouré la douceur, et qui estes d’vne race lettrée (car nous auons encore les escrits de ces anciens Comtes de Foix, d’où Monsieur le Comte vostre mary et vous, estes descendus : et François Monsieur de Candale, vostre oncle, en faict naistre tous les iours d’autres, qui estendront la cognoissance de cette qualité de vostre famille, à plusieurs siècles) ie vous veux dire là dessus vne seule fantasie, que i’ay contraire au commun vsage. C’est tout ce que ie puis conférer à vostre seruice en cela.La charge du gouuerneur, que vous luy donrez, du chois duquel dépend tout l’effect de son institution, elle a plusieurs autres grandes
