moins qu’à moy vne chiquenaude ; qui ne remuent ny langue ny. sourcil, aux coups qu’on leur donne. Quand les athlètes contrefont les Philosophes en patience, c’est plustost vigueur de nerfs que de cœur. Or l’accoustumance à porter le trauail, est accoustumance à porter la douleur : labor collum obducit dolon. Il le faut rompre à la peine, et aspreté des exercices, pour le dresser à la peine, et aspreté de la dislocation, de la colique, du caustere : et de la geaule aussi, et de la torture. Car de ces derniers icy, encore peut-il estre en prinse, qui regardent les bons, selon le temps, comme les meschants. Nous en sommes à l’espreuue. Quiconque combat les loix, menace les gents de bien d’escourgees et de la corde. Et puis, l’authorité du gouuerneur, qui doit estre souueraine sur luy, s’interrompt et s’empesche par la présence des parents. Ioint que ce respect que la famille luy porte, la cognoissance des moyens et grandeurs de sa maison, ce ne sont à mon opinion pas légères incommoditez en cet aage.En cette escole du commerce des hommes, i’ay souuent remarqué ce vice, qu’au lieu de prendre cognoissance d’autruy, nous ne trauaillons qu’à la donner de nous : et sommes plus en peine d’emploiter nostre marchandise, que d’en acquérir de nouuelle. Le silence et la modestie sont qualitez tres-commodes à la conuersation. On dressera cet enfant à estre espargnant et mesnager de sa suffisance, quand il l’aura acquise, à ne se formalizer point des sottises et fables qui se diront en sa présence : car c’est vne inciuile importunité de choquer tout ce qui n’est pas de nostre appétit. Qu’il se contente de se corriger soy mesme. Et ne semble pas reprocher à autruy, tout ce qu’il refuse à faire : ny contraster aux mœurs publiques. Licet sapere sine pompa, sine inuidia. Fuie ces images regenteuses du monde, et inciuiles : et cette puérile ambition, de vouloir paroistre plus fin, pour estre autre ; et comme si ce fust marchandise malaizee, que reprehensions et nouuelletez, vouloir tirer de là, nom de quelque peculiere valeur. Combien il n’affiert qu’aux grands Poètes, d’vser des licences de l’art : aussi n’est-il supportable, qu’aux grandes âmes et illustres de se priuilegier au dessus de la coustume. Si quid Socrates et Aristippus contra rnorem et consuetudinem fecerunt, idem sibi ne arbitretur icere : magnis enim illi et diuinis bonis hanc licentiam assequebantur. On luy apprendra de n’entrer en discours et contestation, que là où il verra vn champion digne de sa lute : et là mesmes à n’emploier pas tous les
