puis, en personne, à l’exemple d’aucuns des anciens, honnestement et louablement. Il estoit loisible, mesme d’en, faire mestier, aux gents d’honneur et en Grèce, Aristoni trayico actori rem aperit : huic et genus et fortuna honesta erant : nec ars, quia nihil taie apud Græcos pudori est, ea deformabat.Car i’ay tousiours accusé d’impertinence, ceux qui condemnent ces esbatemens ; et d’iniustice, ceux qui refusent l’entrée de nos bonnes villes aux comédiens qui le valent, et enuient au peuple ces plaisirs publiques. Les bonnes polices prennent soing d’assembler les citoyens, et les r’allier, comme aux offices sérieux de la deuotion, aussi aux exercices et ieux. La société et amitié s’en augmente, et puis on ne leur sçauroit concéder des passetemps plus réglez, que ceux qui se font en présence d’vn chacun, et à la veuë mesme du magistrat : et trouuerois raisonnable que le Prince à ses despens en gratifiast quelquefois la commune, d’vne affection et bonté comme paternelle : et qu’aux villes populeuses il y eust des lieux destinez et disposez pour ces spectacles : quelque diuertissement de pires actions et occultes.
Pour reuenir à mon propos, il n’y a tel, que d’allécher l’appétit et l’affection, autrement on ne fait que des asnes chargez de liures : on leur donne à coups de foüet en garde leur pochette pleine de science. Laquelle pour bien faire, il ne faut pas seulement loger chez soy, il la faut espouser.
CHAPITRE XXVI.
e n’est pas à l’aduenture sans raison, que nous attribuons à
simplesse et ignorance, la facilité de croire et de se laisser persuader.
Car il me semble auoir appris autrefois, que la créance
estoit comme vne impression, qui se faisoit en nostre ame ; et à
mesure qu’elle se trouuoit plus molle et de moindre résistance, il
estoit plus aysé à y empreindre quelque chose. Vt necesse est lancem in libra ponderibus impositis deprimi : sic animum perspicuis cedere. D’autant que l’ame est plus vuide, et sans contrepoids, elle
