ont vn fondement massif et tressolide : et que ce n’est que bestise et ignorance, qui nous fait les receuoir auec moindre reuerence que le reste. Que ne nous souuient il combien nous sentons de contradiction en nostre iugement mesmes ? combien de choses nous seruoyent hyer d’articles de foy, qui nous sont fables auiourd’huy ? La gloire et la curiosité, sont les fleaux de nostre ame. Cette cy nous conduit à mettre le nez par tout, et celle là nous défend de rien laisser irrésolu et indécis.
CHAPITRE XXVII.
onsidérant la conduite de la besongne d’vn peintre que i’ay, il
m’a pris enuie de l’ensuiure. Il choisit le plus bel endroit et
milieu de chaque paroy, pour y loger vn tableau élabouré de toute
sa suffisance ; et le vuide tout au tour, il le remplit de crotesques :
qui sont peintures fantasques, n’ayans grâce qu’en la variété et estrangeté.
Que sont-ce icy aussi à la vérité que crotesques et corps
monstrueux, rappiecez de diuers membres, sans certaine figure,
n’ayants ordre, suite, ny proportion que fortuite ?
Ie vay bien iusques à ce second point, auec mon peintre : mais ie demeure court en l’autre, et meilleure partie : car ma suffisance ne va pas si auant, que d’oser entreprendre vn tableau riche, poly et formé selon l’art. Ie me suis aduisé d’en emprunter vn d’Estienne de la Boitie, qui honorera tout le reste de cette besongne. C’est vn discours auquel il donna nom : La Seruitude volontaire : mais ceux qui l’ont ignoré, font bien proprement dépuis rebatisé, le Contre-vn. Il l’escriuit par manière d’essay, en sa première ieunesse, à l’honneur de la liberté contre les tyrans. Il court pieça és mains des gens d’entendement, non sans bien grande et méritée recommandation : car il est gentil, et plein ce qu’il est possible. Si y a il bien à dire, que ce ne soit le mieux qu’il peust faire : et si en l’aage que ie l’ay cogneu plus auancé, il eust pris vn tel desseing que le mien, de mettre par escrit ses fantasies, nous verrions plusieurs choses rares.
