et qui nous approcheroient bien près de l’honneur de l’antiquité : car notamment en cette partie des dons de nature, ie n’en cognois point qui luy soit comparable. Mais il n’est demeuré de luy que ce discours, encore par rencontre, et croy qu’il ne le veit oncques depuis qu’il luy eschappa : et quelques mémoires sur cet edict de lanuier fameux par nos guerres ciuiles, qui trouueront encores ailleurs peut estre leur place. C’est tout ce que i’ay peu recouurer de ses reliques (moy qu’il laissa d’vne si amoureuse recommandation, la mort entre les dents, par son testament, héritier de sa bibliothèque et de ses papiers) outre le liuret de ses œuures que i’ay faict mettre en lumière. Et si suis obligé particulièrement à cette pièce, d’autant qu’elle a seruy de moyen à nostre première accointance. Car elle me fut montrée longue espace auant que ie l’eusse veu ; et me donna la première cognoissance de son nom, acheminant ainsi cette amitié, que nous auions nourrie, tant que Dieu a voulu, entre nous, si entière et si parfaicte, que certainement il ne s’en lit guère de pareilles : et entre nos hommes il ne s’en voit aucune trace en vsage. Il faut tant de rencontre à la bastir, que c’est beaucoup si la fortune y arriue vne fois en trois siècles.Il n’est rien à quoy il semble que nature nous aye plus acheminés qu’à la société. Et dit Aristote, que les bons législateurs ont eu plus de soing de l’amitié, que de la iustice. Or le dernier point de sa perfection est cetuy-cy. Car en general toutes celles que la volupté, ou le profit, le besoin publique on priué, forge et nourrit, en sont d’autant moins belles et généreuses, et d’autant moins amitiez, qu’elles meslent autre cause et but et fruit en l’amitié qu’elle mesme. Ny ces quatre espèces anciennes, naturelle, sociale, hospitalière, vénérienne, particulièrement n’y conuiennent, ny coniointement.Des enfans aux pères, c’est plustost respect. L’amitié se nourrit de communication, qui ne peut se trouuer entre eux, pour la trop grande disparité, et offenceroit à l’aduenture les deuoirs de nature : car ny toutes les secrettes pensées des pères ne se peuuent communiquer aux enfans, pour n’y
