engendrer vne messeante priuauté : ny les aduertissemens et corrections, qui est vn des premiers offices d’amitié, ne se pourroient exercer des enfans aux pères. Il s’est trouué des nations, où par vsage les enfans tuoyent leurs pères : et d’autres, où les pères tuoyent leurs enfans, pour euiter l’empeschement qu’ils se peuuent quelquesfois entreporter : et naturellement l’vn dépend de la ruine de l’autre. Il s’est trouué des philosophes desdaignans cette cousture naturelle, tesmoing Aristippus qui quand on le pressoit de l’affection qu’il deuoit à ses enfans pour estre sortis de luy, il se mit à cracher, disant, que cela en estoit aussi bien sorty : que nous engendrions bien des pouz et des vers. Et cet autre que Plutarque vouloit induire à s’accorder auec son frère : Ie n’en fais pas, dit-il, plus grand estât, pour estre sorty de mesme trou. C’est à la vérité vn beau nom, et plein de dilection que le nom de frère, et à cette cause en fismes nous luy et moy nostre alliance : mais ce meslange de biens, ces partages, et que la richesse de l’vn soit la pauureté de l’autre, cela detrampe merueilleusement et relasche cette soudure fraternelle. Les frères ayants à conduire le progrez de leur auancement, en mesme sentier et mesme train, il est force qu’ils se heurtent et choquent souuent. D’auantage, la correspondance et relation qui engendre ces vrayes et parfaictes amitiez, pourquoy se trouuera elle en ceux cy ? Le père et le fils peuuent estre de complexion entièrement eslongnee, et les frères aussi. C’est mon fils, c’est mon parent : mais c’est vn homme farouche, vn meschant, ou vn sot. Et puis, à mesure que ce sont amitiez que la loy et l’obligation naturelle nous commande, il y a d’autant moins de notre choix et liberté volontaire : et nostre liberté volontaire n’a point de production qui soit plus proprement sienne, que celle de l’affection et amitié. Ce n’est pas que le n’aye essayé de ce costé là, tout ce qui en peut estre, ayant eu le meilleur père qui fut onques, et le plus indulgent, iusques à son extrême vieillesse : et estant d’vne famille fameuse de père en fils, et exemplaire en cette partie de la concorde fraternelle :
et ipse
Notas in fratres animi paterni.
D’y comparer l’affection enuers les femmes, quoy qu’elle naisse de
nostre choix, on ne peut : ny la loger en ce rolle. Son feu, ie le
confesse,
neque enim est dea nescia nostri
Quæ dulcem curis miscet amaritiem,
est plus actif, plus cuisant, et plus aspre. Mais c’est vn feu téméraire
et volage, ondoyant et diuers, feu de fiebure, subiect à accez
