Tu prins la grâce à toy seule ordonnée,
Tu pillas tant de beautez qu’elle auoit :
Tant qu’elle, fiere, alors qu’elle te veoit
En est par fois, elle mesme estonnée.
Ta main de prendre en fin se contenta :
Mais la nature encor te presenta,
Pour t’enrichir cette terre ou nous sommes.
Tu n’en prins rien : mais en toy tu t’en ris,
Te sentant bien en auoir assez pris
Pour estre icy royne du cœur des hommes.
CHAPITRE XXIX.
omme si nous allions l’attouchement infect, nous corrompons par
nostre maniement les choses qui d’elles mesmes sont belles et
bonnes. Nous pouuons saisir la vertu, de façon qu’elle en deuiendra
vicieuse : si nous l’embrassons d’vn désir trop aspre et violant.
Ceux qui disent qu’il n’y a iamais d’excès en la vertu, d’autant que
ce n’est plus vertu, si l’excès y est, se louent des paroles.
Insani sapiens nomen ferat, æquus iniqui,
Vltra quam satis est, virtutem si petat ipsam.
C’est vne subtile considération de la philosophie. On peut et trop
aymer la vertu, et se porter excessiuement en vne action iuste. À
ce biaiz s’accommode la voix diuine. Ne soyez pas plus sages qu’il
ne faut, mais soyez sobrement sages. I’ay veu tel grand, blesser la
réputation de sa religion, pour se montrer religieux outre tout
exemple des hommes de sa sorte. I’ayme des natures tempérées et
moyennes. L’immoderation vers le bien mesme, si elle ne m’offense,
elle m’estonne, et me met en peine de la baptizer. Ny la mère de
Pausanias, qui donna la première instruction, et porta la première
pierre à la mort de son fils : ny le dictateur Posthumius, qui feit
mourir le sien, que l’ardeur de ieunesse auoit heureusement poussé
sur les ennemis, vn peu auant son reng, ne me semble si iuste,
comme estrange. Et n’ayme ny à conseiller, ny à suiure vne vertu
si sauuage et si chère. L’archer qui outrepasse le blanc, faut comme
celuy, qui n’y arriue pas. Et les yeux me troublent à monter à coup,
vers vne grande lumière également comme à deualler à l’ombre.Calliclez en Platon dit, l’extrémité de la philosophie estre dom-
