l’essence : car le profit, la gloire, la crainte, l’accoutumance, et autres telles causes estrangeres nous acheminent à les produire. La iustice, la vaillance, la debonnaireté, que nous exerçons lors, elles peuuent esire ainsi nommées, pour la considération d’autruy, et du visage qu’elles portent en public : mais chez l’ouurier, ce n’est aucunement vertu. Il y a vne autre fin proposée, autre cause mouuante. Or la vertu n’aduoüe rien, que ce qui se faict par elle, et pour elle seule.En cette grande bataille de Potidee, que les Grecs sous Pausanias gaignerent contre Mardonius, et les Perses : les victorieux suiuant leur coustume, venants à partir entre eux la gloire de l’exploit, attribuèrent à la nation Spartiate la precellence de valeur en ce combat. Les Spartiates excellents iuges de la vertu, quand ils vindrent à décider, à quel particulier de leur nation debuoit demeurer l’honneur d’auoir le mieux faict en cette iournee, trouuerent qu’Aristodemus s’estoit le plus courageusement hasardé : mais pourtant ils ne luy en donnèrent point de prix, par ce que sa vertu auoit esté incitée du désir de se purger du reproche, qu’il auoit encouru au faict des Thermopyles : et d’vn appétit de mourir courageusement, pour garantir sa honte passée.Nos iugemens sont encores malades, et suyuent la deprauation de nos mœurs. Ie voy la pluspart des esprits de mon temps faire les ingénieux à obscurcir la gloire des belles et généreuses actions anciennes, leur donnant quelque interprétation vile, et leur controuuant des occasions et des causes vaines. Grande subtilité. Qu’on me donne l’action la plus excellente et pure, ie m’en vois y fournir vraysemblablement cinquante vitieuses intentions. Dieu sçait, à qui les veut estendre, quelle diuersité d’images ne souffre nostre interne volonté. Ils ne font pas tant malitieusement, que lourdement et grossièrement, les ingénieux, à tout leur mesdisance.La mesme peine, qu’on prent à detracter de ces grands noms, et la mesme licence, ie la prendroye volontiers à leur prester quelque tour d’espaule pour les hausser. Ces rares figures, et triées pour l’exemple du monde, par le consentement des sages, ie ne me feindroy pas de les recharger d’honneur, autant que mon inuention pourroit, en interprétation et fauorable circonstance. Et il faut croire, que les efforts de nostre inuention sont loing au dessous de leur mérite. C’est l’office des gents de bien, de peindre la vertu la plus belle qui se puisse. Et ne messieroit pas, quand la passion nous trans-
