Plutarque dit d’auantage, que de paroistre si excellent en ces parties moins nécessaires, c’est produire contre soy le tesmoignage d’auoir mal dispencé son loisir, et l’estude, qui deuoit estre employé à choses plus nécessaires et vtiles. De façon que Philippus Roy de Macédoine, ayant ouy ce grand Alexandre son fils, chanter en vn festin, à l’enui des meilleurs musiciens ; N’as-tu pas honte, luy dit-il, de chanter si bien ? Et à ce mesme Philippus, vn musicien contre lequel il debattoit de son art ; Ia à Dieu ne plaise Sire, dit-il, qu’il t’aduienne iamais tant de mal, que tu entendes ces choses là, mieux que moy. Vn Roy doit pouuoir respondre, comme Iphicrates respondit à l’orateur qui le pressoit en son inuectiue de cette manière : Et bien qu’es-tu, pour faire tant le braue ? es-tu homme d’armes, es-tu archer, es-tu piquier ? Ie ne suis rien de tout cela, mais ie suis celuy qui sçait commander à tous ceux-là. Et Antisthenes print pour argument de peu de valeur en Ismenias, dequoy on le vantoit d’estre excellent ioüeur de flustes.Ie sçay bien, quand i’oy quelqu’vn, qui s’arreste au langage des Essais, que i’aimeroye mieux, qu’il s’en teust. Ce n’est pas tant esleuer les mots, comme déprimer le sens : d’autant plus picquamment, que plus obliquement. Si suis-ie trompé si guère d’autres donnent plus à prendre en la matière : et comment que ce soit, mal ou bien, si nul escriuain l’a semée, ny guère plus matérielle, ny au moins plus drue, en son papier. Pour en ranger d’auantage, ie n’en entasse que les testes. Que i’y attache leur suitte, ie multiplieray plusieurs fois ce volume. Et combien y ay-ie espandu d’histoires, qui ne disent mot, lesquelles qui voudra esplucher vn peu plus curieusement, en produira infinis Essais ? Ny elles, ny mes allégations, ne seruent pas tousiours simplement d’exemple, d’authorité ou d’ornement. Ie ne les regarde pas seulement par l’vsage, que i’en tire. Elles portent souuent, hors de mon propos, la semence d’vne matière plus riche et plus hardie : et souuent à gauche, vn ton plus délicat, et pour moy, qui n’en veux en ce lieu exprimer d’auantage, et pour ceux qui rencontreront mon air.Retournant à la vertu parliere, ie ne trouue pas grand choix, entre ne sçauoir dire que mal, on ne sçauoir rien que bien dire. Non est ornamentum virile, concinnitas. Les Sages disent, que pour le regard du sçauoir, il n’est que la philosophie, et pour
