chemise. La nouuelle de cette inhumanité, rapportée à ceux qui estoient en terre, la plus part se résolurent à la seruitude : aucuns firent contenance de changer de religion. Emmanuel successeur de lehan, venu à la couronne, les meit premièrement en liberté, et changeant d’aduis depuis, leur ordonna de sortir de ses païs, assignant trois ports à leur passage. Il esperoit, dit l’Euesque Osorius, non mesprisable historien Latin, de noz siècles : que la faueur de la liberté, qu’il leur auoit rendue, aiant failli de les conuertir au Christianisme, la difficulté de se commettre à la volerie des mariniers, d’abandonner vn pais, où ils estoient habituez, auec grandes richesses, pour s’aller ietter en région incognue et estrangere, les y rameineroit. Mais se voyant dccheu de son espérance, et eux tous délibérez au passage : il retrancha deux des ports, qu’il leur auoit promis : affin que la longueur et incommodité du traiect en reduisist aucuns : ou qu’il eust moien de les amonceller tous à vn lieu, pour vue plus grande commodité de l’exécution qu’il auoit destinée. Ce fut, qu’il ordonna qu’on arrachast d’entre les mains des pères et des mères, tous les enfans au dessous de quatorze ans, pour les transporter hors de leur veue et conuersation, en lieu où ils fussent instruits à nostre religion. Il dit que cet effect produisit vn horrible spectacle : la naturelle affection d’entre les pères et enfants, et de plus, le zèle à leur ancienne créance, combattant à l’encontre de cette violente ordonnance. Il fut veu communément des pères et mères se deffaisants eux mesmes : et d’vn plus rude exemple encore, précipitants par amour et compassion, leurs ieunes enfans dans des puits, pour fuir à la loy. Au demeurant le terme qu’il leur auoit prefix expiré, par faute de moiens, ils se remirent en seruitude. Quelques vns se feirent Ghrestiens : de la foy desquels, ou de leur race, encore auiourd’huy, cent ans après, peu de Portugais s’asseurent : quoy que la coustume et la longueur du temps, soient bien plus fortes conseillères à telles mutations, que toute autre contreinte. En la ville de Castelnau Darry, cinquante Albigeois hérétiques, souffrirent à la fois, d’vn courage déterminé, d’estre bruslez vifs en vn feu, auant desaduouer leurs opinions. Quoties non modo ductores nostri, dit Cicero, sed vniuersi etiam exercitus, ad non dubiam mortem concurrerunt ?I’ay veu quelqu’vn de mes intimes amis courre la mort à force, d’vne vraye affection, et enracinée en son cœur par diuers visages de discours, que ie ne luy sçeu rabatre : et à la première qui s’offrit coiffée d’vn lustre d’honneur, s’y précipiter hors de toute apparence, d’vne fin aspre et ardente. Nous auons plusieurs
