exemples en nostre temps de ceux, iusques aux enfans, qui de craincte de quelque légère incommodité, se sont donnez à la mort. Et à ce propos, que ne craindrons nous, dit vn ancien, si nous craignons ce que la couardise mesme a choisi pour sa retraitte ?D’enfiler icy vn grand rolle de ceux de tous sexes et conditions, et de toutes sectes, es siècles plus heureux, qui ont ou attendu la mort constamment, ou recerchee volontairement : et recherchée non seulement pour fuir les maux de cette vie, mais aucuns pour fuir simplement la satiété de viure : et d’autres pour l’espérance d’vne meilleure condition ailleurs, ie n’auroy iamais fait. Et en est le nombre si infini, qu’à la vérité i’auroy meilleur marché de mettre en compte ceux qui l’ont crainte. Cecy seulement. Pyrrho le Philosophe se trouuant vn iour de grande tourmente dans vn batteau, montroit à ceux qu’il voyoit les plus effrayez autour de luy, et les encourageoit par l’exemple d’vn pourceau, qui y estoit, nullement soucieux de cet orage. Oserons nous donc dire que cet aduantage de la raison, dequoy nous faisons tant de feste, et pour le respect duquel nous nous tenons maistre et Empereurs du reste des créatures, ait esté mis en nous, pour nostre tourment ? À quoy faire la cognoissance des choses, si nous en deuenons plus lasches ? si nous en perdons le repos et la tranquilité, où nous serions sans cela ? et si elle nous rend de pire condition que le pourceau de Pyrrho ? L’intelligence qui nous a esté donnée pour nostre plus grand bien, l’employerons nous à nostre ruine ; combatans le dessein de nature, et l’vniuersel ordre des choses, qui porte que chacun vse de ses vtils et moyens pour sa commodité ?Bien, me dira lon, vostre règle serue à la mort ; mais que direz vous de l’indigence ? que direz vous encor de la douleur, qu’Aristippus, Hieronymus et la pluspart des sages, ont estimé le dernier mal : et ceux qui le nioient de parole, le confessaient par effect ? Possidonius estant extrêmement tourmenté d’vne maladie aigüe et douloureuse, Pompeius le fut voir, et s’excusa d’auoir prins heure si importune pour l’ouyr deuiser de la Philosophie : la à Dieu ne plaise, luy dit Possidonius, que la douleur gaigne tant sur moy, qu’elle m’empesche d’en discourir : et se ietta sur ce mesme propos du mespris de la douleur. Mais ce pendant elle ioüoit
