Car ie suis l’homme du monde qui luy veux autant de mal, et qui la fuis autant, pour iusques à présent n’auoir pas eu, Dieu mercy, grand commerce auec elle ; mais il est en nous, sinon de l’anéantir, au moins de l’amoindrir par patience : et quand bien le corps s’en esmouueroit, de maintenir ce neant-moins l’ame et la raison en bonne trampe. Et s’il ne l’estoit, qui auroit mis en crédit, la vertu, la vaillance, la force, la magnanimité et la resolution ? où iouëroyent elles leur rolle, s’il n’y a plus de douleur à deffier ? Auida est periculi virtus. S’il ne faut coucher sur la dure, soustenir armé de toutes pièces la chaleur du midy, se paistre d’vn cheual, et d’vn asne, se voir détailler en pièces, et arracher vne balle d’entre les os, se souffrir recoudre, cauterizer et sonder, par où s’acquerra l’aduantage que nous voulons auoir sur le vulgaire ? C’est bien loing de fuir le mal et la douleur, ce que disent les Sages, que des actions égallement bonnes, celle-là est plus souhaitable à faire, où il y a plus de peine. Non enim hilaritate, nec lasciuia, nec risu aut ioco comité leuitatis, sed sæpe etiam tristes firmitate et constantia sunt beati. Et à cette cause il a esté impossible de persuader à nos pères, que les conquestes faites par viue force, au hazard de la guerre, ne fussent plus aduantageuses, que celles qu’on fait en toute seureté par pratiques et menées.
D’auantage cela nous doit consoler, que naturellement, si la douleur est violente, elle est courte : si elle est longue, elle est légère : si grauis, breuis : si longus, leuis. Tu ne la sentiras guère long temps, si tu la sens trop : elle mettra fin à soy, ou à toy : l’vn et l’autre reuient à vn. Si tu ne la portes, elle t’emportera. Memineris maximos morte finiri ; paruos multa habere interualla requietis, mediocrium nos esse dominos : vt si tolerabiles sint, feramus : sin minus, è vita, quum ea non placeat, tanquàm è theatro exeamus.
Ce qui nous fait souffrir auec tant d’impatience la douleur, c’est de n’estre pas accoustumez de prendre nostre principal contentement en l’ame, de ne nous attendre point assez à elle, qui est seule et souueraine maistresse de nostre condition. Le corps n’a, sauf le plus et le moins, qu’vn train et qu’vn pli. Elle est variable en toute sorte de formes,
