prisé la gloire.Toutes autres choses tombent en commerce. Nous prestons nos biens et nos vies au besoin de nos amis : mais de communiquer son honneur, et d’estrener autruy de sa gloire, il ne se voit gueres. Catulus Luctatius en la guerre contre les Cymbres, ayant faict tous efforts pour arrester ses soldats qui fuioient deuant les ennemis, se mit luy-mesmes entre les fuyards, et contrefit le couard, affin qu’ils semblassent plustost suiure leur Capitaine, que fuyr l’ennemy : c’estoit abandonner sa réputation, pour couurir la honte d’autruy. Quand Charles cinquiesme passa en Prouence, l’an mil cinq cens trente sept, on tient que Antoine de Leue voyant l’Empereur résolu de ce voyage, et l’estimant luy estre merueilleusement glorieux, opinoit toutesfois le contraire, et le desconseilloit, à cette fin que toute la gloire et honneur de ce conseil, en fust attribué à son maistre : et qu’il fust dict, son bon aduis et sa preuoyance auoit esté telle, que contre l’opinion de tous, il cust mis à fin vne si belle entreprinse : qui estoit l’honorer à ses despens. Les Ambassadeurs Thraciens, consolans Archileonide mère de Brasidas, de la mort de son fils, et le haut-louans, iusques à dire, qu’il n’auoit point laissé son pareil : elle refusa cette louange priuee et particulière, pour la rendre au public : Ne me dites pas cela, fit-elle, ie sçay que la ville de Sparte a plusieurs citoyens plus grands et plus vaillans qu’il n’estoit. En la bataille de Crecy, le Prince de Gales, encores fort ieune, auoit l’auant-garde à conduire : le principal effort du rencontre, fust en cet endroit : les Seigneurs qui l’accompagnoient se trouuans en dur party d’armes, mandèrent au Roy Edouard de s’approcher, pour les secourir : il s’enquit de Testât de son fils, et luy ayant esté respondu, qu’il estoit viuant et à cheual : le luy ferois, dit-il, tort de luy aller maintenant desrober l’honneur de la victoire de ce combat, qu’il a si long temps soustenu : quelque hazard qu’il y ait, elle sera toute sienne : et n’y voulut aller ny enuoyer : sçachant s’il y fust allé, qu’on eust dit que tout estoit perdu sans son secours, et qu’on luy eust attribué l’aduantage de cet exploit. Semper enim quod postremum adiectum est, id rem totam videtur traxisse. Plusieurs estimoient à Rome, et se disoit communément que les principaux beaux-faits de Scipion estoient en partie deuz à Lælius, qui toutesfois alla tousiours promouuant et secondant la grandeur et gloire de Scipion, sans aucun soing de la sienne. Et Theopompus Roy de Sparte à celuy qui luy disoit que la chose publique demeuroit sur ses pieds, pour autant qu’il sçauoit bien commander : C’est plustost, dit-il, parce que le peuple sçait bien obeyr.
Comme les femmes, qui succedoient aux pairries, auoient, nonobstant leur sexe, droit d’assister et opiner aux causes, qui ap-
